SEMANA DO LIBRO, LECTURA NA PRAZA

Esta semana saímos á rúa acompañados dunha sorpresa… o libro A ra de tres ollos!

Porque os contos non só para contar na biblioteca ou na clase, senón que se poden desfrutar en calquera lugar!
Ao mesmo tempo, traballamos a reciclaxe con esta fermosa historia, facéndonos responsables dos residuos que producimos.
Pasar o almorzo e o tempo de lecer no Parque da Vila foi toda unha experencia!

ARCOS DA VELLA CON SAL DE CORES

Aproveitando a chegada desta estación tan colorida, hoxe na clase de 4 anos B fixemos unha actividade moi especial, creamos arcos da vella dentro dunha botella. Para facelo empregamos xiz de diferentes cores e sal e, por suposto, moita paciencia e precisión. Éncantounos! 

DÍA MUNDIAL DA SAÚDE CUNHA CARREIRA SOLIDARIA

Rematamos o segundo trimestre e, aproveitando a conmemoración do Día Mundial da Saúde, participamos na campaña La Vuelta al Cole da Fundación Unoentrecienmil,  unha carreira solidaria co obxectivo de sensiblizar á comunidade educativa e recaudar fondos para seguir investigando a leucemia infantil. E despois da carreira, un almorzo saudable para repoñer forzas!

Grazas a todas as familias por participar e compartir con nós un día tan especial!

FAMILIAS QUE CONTAN: OBRADOIRO DE COSTURA

Na clase de 4 anos B hoxe tivemos unha visita moi especial, unha nai experta en costura que, ademais de contarnos o conto de As Tesoiras de Punta Redonda, nos ensinou todo o que hai dentro do seu costureiro e unhas máquinas de coser en miniatura que nos gustaron moitísimo. Tamén nos trouxo uns bolsiños moi bonitos que coseu para agasallarnos e que rematamos nós mesmos cunhas puntadas decorativas. Moitas grazas, aprendemos moito e pasámolo moi ben!

HAPPY EASTER!

Esta semana pintamos e decoramos uns coelliños e atopamos todos os ovos de chocolate agochados no patio! Foi moi divertido!

SEMANA DA PRENSA

Hoxe as pequenas e pequenos de 5 anos entregaron por diferentes comercios de Sarria o periódico elaborado como conmemoración da Semana da Prensa.

O alumnado tamén levou para casa un exemplar para compartir coas familias todas as novas da escola.

Esperamos que vos guste!

 

A PRIMAVERA XA CHEGOU

A chegada da primavera trouxo novas propostas de xogo e arte á escola. Por aquí vos deixamos algunhas das que máis nos gustan: murais, grafismos, mesturas de cores, lóxica, atención e sobre todo, moita creatividade!

BICHOS, COMEZAMOS NOVA AVENTURA CUN SCAPE ROOM

Na clase de 4 anos B comezamos un novo proxecto de investigación: os insectos. A Xeliña gustalle moito facernos pensar así que deixounos todo o material para investigar en catro caixas pechadas con candados, pero as chaves estaban escondidas por toda a escola. Menos mal que tamén nos deixou no buzón as pistas para encontralas! Grazas a ir resolvendo as adiviñas relacionadas cos insectos na pantalla dixital, conseguimos os códigos numéricos que precisábamos, e ó final abrimos as catro caixas! Foi moi emocionante!  

DIA MUNDIAL DA CONCIENCIACIÓN DO AUTISMO

 Hoxe conmemoramos o Día Mundial da Concienciación sobre o Autismo. As gafas que creamos recórdannos que existen infinitas formas de percibir e sentir e que as persoas que están dentro do espectro autista procesan o mundo dunha forma distinta. Contos, como o de Distinta ou El casco azul, e curtas, como a de Mi hermano Luca, achégannos máis a esta condición coa que convivimos cada día e da que aprendemos tanto. Recomendámosvolos!