XELIÑA RECOMENDA

Por aquí vos deixamos as recomendacións lectoras para este verán. Felices vacacións!

 

O BISCOITO DE COCORICO

Esta semana convertémonos en auténticos/as cociñeiros/as! Despois de coñecer o conto Cocorico, puxemos o mandil e seguimos a receita para preparar un delicioso biscoito de iogur.

🥚 Batemos os ovos
🥄 Mesturamos os ingredientes
🍋 Engadimos a reladura de limón
🤝 Traballamos en equipo e compartimos tarefas

Foi unha experiencia chea de aprendizaxes, na que practicamos a lectura de receitas, a medición de cantidades, a motricidade fina e, sobre todo, a colaboración entre compañeiros/as.

O mellor chegou ao final: degustar o noso biscoito caseiro!

AVENTURA BOTÁNICA, EXPERTAS POLINIZADORAS

O longo deste trimestre, nas aulas de 3 anos estamos a aprender moito das grandes polinizadoras do mundo botánico, as abellas.  A través de contos, cancións, manualidades e xogos, descubrimos como estes incribles insectos axudan a polinizar as flores e a que crezan as froitas e verduras que comemos cada día. 
Tamén falamos de como podemos coidalas, como nacen, onde viven, como se organizan e unha chea de datos curiosos destes pequenos bechos, sobre todo cales son as súas flores e plantas favoritas. 

AVENTURA BOTÁNICA EN FLOR

Ó longo deste trimestre nas aulas de 4 anos estamos aprendendo moito sobre as flores. Con todo o aprendido estamos creando un pequeno inventario no que incluímos as nosas flores preferidas. Tamén as estamos interpretando mediante diferentes técnicas plásticas e, por suposto, non deixamos de contar, ler e escribir empregando as flores como centro de interese. Menuda colección botánica!

CONTAMOS CONTIÑOS, COCORICO

Hoxe o noso elenco de actrices e músicas deleitáronos cunha divertida actuación, converténdose en Cocorico, mamá Galiña e Gato Pelado. Despois Cocorico e a mamá Galiña repartiron o biscoito polas clases e propuxeronlle ó alumnado un novo obradoiro de cociña, biscoito de limón como o do conto. Agora toca esperar para que Xeliña nos deixe a receita no correo, pero primeiro temos que pedirlla cunha carta. Así escribir é moi divertido e emocionante! 

FAMILIAS QUE CONTAN

Por aquí vos deixamos tres novas entregas da sección familias que contan. Por unha banda, Marta, a nai de Erea, que contou o conto Oito patas na clase de 4º B. Por outra, Diego, o pai de Breixo, que contou Que mal día, gato Klops! e A banda que ninguén coñece na clase de 5ºB. Logo dos contos puideron decorar a Klops, ilustración de Estefanía Padullés. E, para rematar, Jose, pai de Helena, veu contar un conto á súa clase, Telma el unicornio. Tamén nos falou sobre a hixiene ocular. Grazas a todos por vir! Encantounos!

AS NOSAS LETRAS, BEGOÑA CAAMAÑO

Hoxe é o día das nosas Letras. Este ano está dedicado a Begoña Caamaño e na nosa escola fixemos un mural colaborativo baseado nas ilustracións de Agustina Shuan para o libro Begoñísima da editora Cuarto de Inverno. Tamén creamos entre todos un xogo de memoria con imaxes relacionadas con aspectos da sía vida. Que vivan as nosas Letras e a nosa lingua!

A NOSA MÚSICA

Hoxe comezamos os festexos das Letras Galegas dunha maneira moi especial, tivemos de concerto na nosa escola a cargo dalgúns músicos da ESMUSA que nos viñeron a tocar varias pezas de música tradicional galega. Gustounos moito, Moitas grazas!

AÍ VÉN O MAIO, QUE MAIO É

Hoxe celebramos o Maio, unha festa popular galega que ten lugar ao comezo da primavera, cuxas orixes remóntanse ás civilizacións prerromanas.

Durante as festas realízanse representacións, bailes e cantos arredor dos maios, unhas estruturas tradicionalmente inspiradas en figuras de árbores pero que hoxe en día adoptan formas máis variadas, con adornos de flores, follas e froitos.

Así de bonito nos quedou o noso maio!

FAMILIAS QUE CONTAN, O GALO QUE PUXO UN OVO

Hoxe as nenas e nenos de 3 anos tivemos unha visita moi especial. Lucía, a mamá de André, veu contarnos o conto O galo que puxo un ovo, unha historia moi divertida.

Despois de contalo ensinounos un vídeo de cómo nacen os pitiños, e xa para rematar, trouxo dous de verdade, encantounos velos e tocalos. Moitas grazas por animarte a vir.

CANDO LEMOS, FELIZ DÍA DO LIBRO

Ao longo desta semana conmemoramos na escola o Día do Libro. Aproveitando o clima primaveral desprazámonos ata a Praza da Vila para contar contos ó aire libre. E para conmemorar esta data tan especial compartimos con vós as palabras de Eva Mejuto sobre a lectura e os libros: 

Cando lemos 

percorremos silandeiras as bambolinas dos soños.

Cando lemos

somos a luz do torreiro que alumea nos teus ollos;

somos unha e somos todas sucando contra a marea.

Cando lemos

somos a chuvia que lanza o ar e bate a area.

Cando lemos

prendemos lumes sen chama, arredámonos do frío,

escorrentamos o medo, bebemos sol do resío.

Cando lemos

cruzamos pontes de estrelas tecendo con fío invisible...

porque cando lemos

todo é posible,

sobre todo o imposible.

EXPOSICIÓN SEMENTEIROS LEITEIROS

No segundo trimestre as familias participaron nun novo reto, convertir un cartón de leite nunha maceta, e despois na escola plantamos nelas fabas, e este foi o resultado. Moitas grazas por participar no reto e por vir visitar a exposición.

O CAMIÑO DA COVA DE EIRÓS

Hoxe visitamos a exposición vinculada ao documental proxectado na casa da cultura sobre “O Camiño da cova Eirós” fai uns días, nela puidemos ver a recreación dun mamut e dunha cova, así como de diferentes ferramentas e vestimenta empregada naquela época.

Grazas á ANPA do CEIP Frei Luis de Granada e ao Concello de Sarria por contar con nós para poder ir a visitala, encantounos!

XELIÑA VAI Ó HORTO

Ao longo desta semana Xeliña deixounos unha misión, encher o seu invernadoiro de diferentes plantas. Puxemos tomates, leitugas, cebolas, pementos e amorodos. Agora toca coidalas e regalas e esperar que nos dean os seus froitos. 

A TOUPIÑA QUE QUERÍA SABER...

Hoxe desprazámonos ata Lugo para asistir a unha representación teatral no auditorio Gustavo Freire. Unha historia musical interpretada por "A Xanela do Maxín" baseada no álbum editado por Kalandraka, A toupiña que quería saber quen lle fixera aquilo na cabeza. Aproveitando o clima primaveral tamén almorzamos ó aire libre e xogamos no parque. Foi unha mañá xenial!

DÍA MUNDIAL DA SAÚDE, CARREIRA SOLIDARIA

Un curso máis, para conmemorar o Día Mundial da Saúde, fixemos unha carreira solidaria.

Nenas, nenos, familias e profes demos unha volta á escola; e despois merendamos todos xuntos para repoñer forzas. Todo o recadado será doado á Fundación Aladina, que traballan na axuda e investigación para loitar contra o cancro infantil.

Moitísimas grazas ás familias pola vosa colaboración e por facer que sexa un día tan bonito para as vosas fillas e fillos.

XELIÑA INFORMA

HAPPY EASTER, BOA PASCUA!

Ó longo destas dúas últimas semanas de trimestre estivemos preparando a nosa escola para a pascua: coelliños, ovos, cenouras... E, por suposto, rematamos ca tradicional busca de ovos de chocolate. Encántanos!

CONCERTO DIDÁCTICO DA TRADESCOLA

Hoxe tivemos a visita de Xabi, Lucía e Mónica, profesores da Tradescola que nos ensinaron algúns dos instrumentos da nosa música tradicional. E, como non, rematamos bailando a muiñeira. Pasámolo moi ben! Agardamos volver vervos o próximo curso. Moitas grazas! 

O PARQUE DE BOMBEIROS

Hoxe os nenos e nenas de 4 anos achegámonos ó Parque de Bombeiros de Sarria para coñecer de cerca o seu traballo. Álvaro, Jose, Nacho e Miguel foron moi amables connosco, da súa man vimos as instalacións do parque, os seus traxes, os vehículos e superamos distintos retos. Voltamos á escola felices!