DÁLLE RITMO Ó VERÁN

Rematamos o curso con moito ritmo. Na derradeira festa o noso alumnado puido rotar por diferentes postos: baile de disfraces, obradoiro de colares, decoración de camisetas e pintura mural. Foi moi divertido! Vémonos en setembro!

FAMILIAS QUE CONTAN

No mes de xuño as familias contaron moito. Por aquí vos deixamos unha pequena mostra. Grazas a todos e todas por vir compartir tempo con nós! Ata o curso que vén! 

XELIÑA RECOMENDA

Por aquí vos deixamos as recomendacións lectoras para este verán. Felices vacacións!

 

O BISCOITO DE COCORICO

Esta semana convertémonos en auténticos/as cociñeiros/as! Despois de coñecer o conto Cocorico, puxemos o mandil e seguimos a receita para preparar un delicioso biscoito de iogur.

🥚 Batemos os ovos
🥄 Mesturamos os ingredientes
🍋 Engadimos a reladura de limón
🤝 Traballamos en equipo e compartimos tarefas

Foi unha experiencia chea de aprendizaxes, na que practicamos a lectura de receitas, a medición de cantidades, a motricidade fina e, sobre todo, a colaboración entre compañeiros/as.

O mellor chegou ao final: degustar o noso biscoito caseiro!

FAMILIAS QUE CONTAN

Hoxe tivemos unha visita moi especial, Pablo, o pai de Helvia e Xiana. Veu para explicarnos como viven as abellas e como se produce o mel.

Trouxo diferentes materiais que utiliza no seu traballo, como o traxe de protección, os luvas e o afumador. Contounos que as abellas son moi importantes para a natureza porque axudan a polinizar as flores e os cultivos.

Tamén nos ensinou un panal e puidemos observar como almacenan o mel. Aprendemos que nunha colmea viven miles de abellas e que cada unha ten unha función diferente.

Ao final da charla fixemos preguntas e deixounos mel e pole para probar, tamen nos trouxo un agasallo para cada un. Foi unha experiencia moi interesante e divertida, e aprendemos moitas cousas sobre o mundo das abellas.

Moitas grazas! Encantounos!

AVENTURA BOTÁNICA, EXPERTAS POLINIZADORAS

O longo deste trimestre, nas aulas de 3 anos estamos a aprender moito das grandes polinizadoras do mundo botánico, as abellas.  A través de contos, cancións, manualidades e xogos, descubrimos como estes incribles insectos axudan a polinizar as flores e a que crezan as froitas e verduras que comemos cada día. 
Tamén falamos de como podemos coidalas, como nacen, onde viven, como se organizan e unha chea de datos curiosos destes pequenos bechos, sobre todo cales son as súas flores e plantas favoritas. 

AVENTURA BOTÁNICA EN FLOR

Ó longo deste trimestre nas aulas de 4 anos estamos aprendendo moito sobre as flores. Con todo o aprendido estamos creando un pequeno inventario no que incluímos as nosas flores preferidas. Tamén as estamos interpretando mediante diferentes técnicas plásticas e, por suposto, non deixamos de contar, ler e escribir empregando as flores como centro de interese. Menuda colección botánica!

DÍA MUNDIAL DO MEDIOAMBIENTE, RUTA POLAS ACEAS

Como o día 5 de xuño se celebra o Día Mundial do Medioambiente, hoxe percorremos a fermosa ruta das Aceas, que descorre pola nosa vila. Como non podía ser doutro xeito, neste curso de "Aventura botánica" fixemos o camiño mentres falabamos sobre as árbores e plantas da nosa contorna.

Rematamos a andaina cunha merenda e xogos no parque do Chanto.

Un día para valorar e disfrutar do noso entorno, sempre de xeito respetuoso.

CONTAMOS CONTIÑOS, COCORICO

Hoxe o noso elenco de actrices e músicas deleitáronos cunha divertida actuación, converténdose en Cocorico, mamá Galiña e Gato Pelado. Despois Cocorico e a mamá Galiña repartiron o biscoito polas clases e propuxeronlle ó alumnado un novo obradoiro de cociña, biscoito de limón como o do conto. Agora toca esperar para que Xeliña nos deixe a receita no correo, pero primeiro temos que pedirlla cunha carta. Así escribir é moi divertido e emocionante! 

NOVOS RECANTOS NO PATIO

Esta semana estreamos dous recunchos novos no patio, lectura e construción. Están sendo os nosos favoritos! 

FAMILIAS QUE CONTAN

Por aquí vos deixamos tres novas entregas da sección familias que contan. Por unha banda, Marta, a nai de Erea, que contou o conto Oito patas na clase de 4º B. Por outra, Diego, o pai de Breixo, que contou Que mal día, gato Klops! e A banda que ninguén coñece na clase de 5ºB. Logo dos contos puideron decorar a Klops, ilustración de Estefanía Padullés. E, para rematar, Jose, pai de Helena, veu contar un conto á súa clase, Telma el unicornio. Tamén nos falou sobre a hixiene ocular. Grazas a todos por vir! Encantounos!

OBRADOIRO LUZ NEGRA

Por aquí vos deixamos o obradoiro de luz azul que fixemos na clase de cinco anos B. Con cores fluorescentes fixemos diferentes creacións florais. Encantounos!

EXPOSICIÓN ARTE EN FLOR

Hoxe puido visitarse na nosa biblioteca a derradeira exposición do curso con todas as creacións do reto do terceiro trimestre "Arte en flor". Moitas grazas nenos e nenas e familias polas vosas achegas, menudos artistas!

AS NOSAS LETRAS, BEGOÑA CAAMAÑO

Hoxe é o día das nosas Letras. Este ano está dedicado a Begoña Caamaño e na nosa escola fixemos un mural colaborativo baseado nas ilustracións de Agustina Shuan para o libro Begoñísima da editora Cuarto de Inverno. Tamén creamos entre todos un xogo de memoria con imaxes relacionadas con aspectos da sía vida. Que vivan as nosas Letras e a nosa lingua!

AÍ VÉN O MAIO, QUE MAIO É

Hoxe celebramos o Maio, unha festa popular galega que ten lugar ao comezo da primavera, cuxas orixes remóntanse ás civilizacións prerromanas.

Durante as festas realízanse representacións, bailes e cantos arredor dos maios, unhas estruturas tradicionalmente inspiradas en figuras de árbores pero que hoxe en día adoptan formas máis variadas, con adornos de flores, follas e froitos.

Así de bonito nos quedou o noso maio!

FAMILIAS QUE CONTAN, O GALO QUE PUXO UN OVO

Hoxe as nenas e nenos de 3 anos tivemos unha visita moi especial. Lucía, a mamá de André, veu contarnos o conto O galo que puxo un ovo, unha historia moi divertida.

Despois de contalo ensinounos un vídeo de cómo nacen os pitiños, e xa para rematar, trouxo dous de verdade, encantounos velos e tocalos. Moitas grazas por animarte a vir.

CANDO LEMOS, FELIZ DÍA DO LIBRO

Ao longo desta semana conmemoramos na escola o Día do Libro. Aproveitando o clima primaveral desprazámonos ata a Praza da Vila para contar contos ó aire libre. E para conmemorar esta data tan especial compartimos con vós as palabras de Eva Mejuto sobre a lectura e os libros: 

Cando lemos 

percorremos silandeiras as bambolinas dos soños.

Cando lemos

somos a luz do torreiro que alumea nos teus ollos;

somos unha e somos todas sucando contra a marea.

Cando lemos

somos a chuvia que lanza o ar e bate a area.

Cando lemos

prendemos lumes sen chama, arredámonos do frío,

escorrentamos o medo, bebemos sol do resío.

Cando lemos

cruzamos pontes de estrelas tecendo con fío invisible...

porque cando lemos

todo é posible,

sobre todo o imposible.

FAMILIAS QUE CONTAN, MARMELADA DE AMORODO

Hoxe na aula de 4 anos, Mila, a nai de Breixo, preparou un taller de marmelada de amorodo. Pasámolo en grande e que rica está. Moitas grazas!

EXPOSICIÓN SEMENTEIROS LEITEIROS

No segundo trimestre as familias participaron nun novo reto, convertir un cartón de leite nunha maceta, e despois na escola plantamos nelas fabas, e este foi o resultado. Moitas grazas por participar no reto e por vir visitar a exposición.

XELIÑA VAI Ó HORTO

Ao longo desta semana Xeliña deixounos unha misión, encher o seu invernadoiro de diferentes plantas. Puxemos tomates, leitugas, cebolas, pementos e amorodos. Agora toca coidalas e regalas e esperar que nos dean os seus froitos.